MS. D. D. Ch. Ch. D. 91

Norton. Robert de Nuiers omnibus s. ecclesie filiis salutem. Sciatis me concessisse ecclesie S⟨ancti⟩ A⟨ugustini⟩ de D⟨auintre⟩ et monachis ibidem deo servientibus totum quod Henricus de Nuiers frater meus et Juliana uxor sua filia et heres Henrici de Chaudri fecerunt predicte ecclesie & monachis de ecclesia de Norton. Recognoverunt enim eis ius suum: ecclesiam scilicet de Norton cum omnibus pertinenciis & libertatibus suis et reddiderunt et ex parte sua donaverunt et carta sua confirmaverunt quod ego ex parte mea et uxoris mee Marie pariter concedo et confirmo. Diligo enim ecclesiam et profectum ejus omnimodo cupio. In fratrem ibidem susceptus sum; et in die susceptionis fide affidavi in manu Philippi de D⟨auintre⟩ quod actionem et cartam fratris mei et meam ubique dum vixero contra omnes homines pro posse meo guarantizabo; Testibus Willelmo sacerdote de Falwelle , Simone capellano de D⟨auintre⟩ , Philippo de D⟨auintre⟩ , Willelmo Gimme, Willelmo nepote prioris. ⟨1191– .⟩